चैत्र ५, काठमाडौं
सार्वजनिक स्थलमा २५ जना भन्दा बढी जम्मा हुन नपाईने
नेपाल सरकारले कोरोना भाइरस फैलन सक्ने जोखिमबाट बच्न सर्वसाधारण जनतालाई अत्यावश्यक काम बाहेक घरबाट बाहिर ननिस्कन आग्रह गरेको छ ।
मानिसहरु भीडभाँड हुने स्थानहरुमा नजान आग्रह गर्दै सार्वजनिक स्थलमा २५ जनाभन्दा बढी भेला नहुन अपिल समेत गरेको छ । सार्वजानिक यातायातमा सचेतना अपनाउन सरकारले निर्णय गरेको छ ।
उपप्रधान एवं रक्षामन्त्री ईश्वर पोखरेल नेतृत्वको कोरोना भाइरस रोकथाम तथा नियन्त्रण उच्च स्तरीय समन्वय समितिको बुधबार काठमाडौंमा बसेको बैठकले यस्तो निर्णय गरेको हो ।
बैठकले सिनेमा हल, सांस्कृतिक केन्द्रहरू, रंगशाला, खेलस्थल, जिम, हेल्थ क्लब, म्युजियम, स्वीमिङ पुल, मनोरञ्जन स्थान, डान्स बार तथा क्लब आदिलाई ३० अप्रिल २०२० सम्म बन्द गर्ने निर्णय छ । यसको अनुगमन गृह मन्त्रालय, पर्यटन तथा नागरिक उड्डयन मन्त्रालय र सञ्चार तथा सूचना मन्त्रालयले गर्नेछ ।
कोरोना प्रभावित ५५ मुलुकबाट नेपाल आउन प्रतिबन्ध
बैठकले युरोपका सबै मुलुक, पश्चिम एसियालगायत खाडी मुलुक, इरान, टर्की, मलेसिया, दक्षिण कोरिया, जापानका नागरिकलाई चैत ७ गतेदेखि वैशाख ३ गतेसम्मका लागि आगमनमा प्रतिबन्ध लगाएको छ ।
यसैगरी खाडी क्षेत्र, युरोपका सबै मुलुक, इरान, टर्की, दक्षिण कोरिया, जापान ट्रान्जिट भई आउने सबैलाई पनि वैशाख ३ गतेसम्मका लागि प्रतिबन्ध लगाइएको छ ।
आवागमनमा लगाएको प्रतिबन्धका कारणले आफ्नो मुलुक फिर्ता जान नसकेका विदेशी नागरिकको भिसा अवधि नियमित गर्न गृह र परराष्ट्र मन्त्रालयले समन्वय गर्ने पनि समितिको बैठकले निर्णय गरेको छ ।
स्कुल–कलेज चैत मसान्तसम्म बन्द
बैठकले स्कुल, कलेज लगायतका शैक्षिक संस्था चैत मसन्तसम्मका लागि बन्द गर्ने निर्णय गरेको छ । चैत्र ६ गते हुने भनिएको एसइई परिक्षा समेत आपतकालिन रुपमा रोक्नुपर्ने अवस्था आएको शिक्षा मन्त्री गिरीराजमणी पोखरेलले जानकारी दिएका छन् ।