भूकम्पपीडित बसेका शिविरहरूमा सरुवा रोग देखिनुका साथै विभिन्न खालका स्वास्थ्य समस्या देखिन थालेको छ, जसलाई समयमै ध्यान नदिने हो भने महामारीको रूप लिने जोखिम छ । भूकम्पपछि पीडितहरूको बसोवासलाई समयमै व्यवस्थापन गर्न नसक्दा सरुवा रोग फैलिने सम्भावना बढेको छ । विगतमा ठूला भूकम्प गएका मुलुकहरूको इतिहासलाई हेर्ने हो भने पीडितहरूको बसोवासलाई समयमै व्यवस्थापन गर्न नसक्दा महामारी फैलिएको घटना छ । हाइटीलाई नै यसको उदाहरणका रूपमा लिन सकिन्छ । त्यसैले विगतमा यसरी भूकम्प प्रभावित भएका मुलुकहरूको घटना र अनुभवबाट पाठ सिक्दै सम्भावित महामारी           रोकथामका लागि प्रभावकारी कदम चाल्न आवश्यक छ । यतिखेर भूकम्पपीडित शिविरहरूमा सरुवा रोगका साथै विभिन्न किसिमका स्वास्थ्य समस्या देखिन थालेको खबर सार्वजनिक भएको     छ । अन्य जिल्लाहरूको समस्या पनि उस्तै छ । भूकम्पका कारण घरबारविहीन भएकाहरूले पालको भरमा चिसो भुइँमा रात बिताउनुपरेपछि बालबालिका तथा वृद्धवृद्धाहरूमा निमोनियाँ, आँखा पाक्ने, खोकी, झाडापखाला, ज्वरो र रगतमासीका समस्या देखिन थालेका हुन् । त्यसमाथि दूषित पानीका कारण झाडापखालाको समस्या अझै वृद्धि भएको छ । यस किसिमको समस्या अन्य गाविसहरूमा पनि फैलिन थालिसकेको छ ।
यस्तो अवस्थामा राहत तथा पुनस्थापना कार्यक्रम हरु राजधानीमा बढी  केन्द्रित भएको देखिन्छ । यस्तै स्वास्थ्य उपचारहरु पनी राजधानीमामात्र बढी केन्द्रित भएको    छ । सबै सेवाहरु  राजधानी केन्द्रित नभएर देशका सम्पूर्ण भु–भागहरु जुन ठाउँहरुमा भुकम्पले प्रभावीत भएका छन्,त्यस्ता ठाउँहरुमा पुग्न जरुरी छ ।